Tré lokaði innkeyrslu í rokinu

Stórt lerkitré lét undan miklum vindi á Egilsstöðum og lokaði leiðinni að endahúsi við Hamrahlíð.

Frétt af mbl.is

Óveður á Austurlandi

Anna Hólm Stefánsdóttir, íbúi hússins, segist hafa tekið eftir því eftir veturinn að tréð væri orðið ansi skakkt og lét bæjaryfirvöld vita að það myndi líklega falla til jarðar í næsta óveðri.

Til stóð að bæjarstarfsmenn myndu ganga í málið en það náðist ekki í tæka tíð því tréð lét undan í nótt eða snemma í morgun.

Ljósmynd/Sigurður Aðalsteinsson

Göngustígur er rétt hjá húsinu og segist Anna Hólm ánægð með að enginn hafi slasast. Gul viðvörun var fyrir austan í nótt og kveðst hún lítillega hafa orðið vör við hvassviðrið í nótt. Hún vaknaði þó ekki upp þegar tréð féll til jarðar og lokaði hjá henni innkeyrslunni.

Anna bíður nú eftir að bæjarstarfsmenn fjarlægi tréð svo að hún geti farið á húsbílnum í sauðburð síðar í dag.

• Blogga um frétt