Þrumur og eldingar voru sunnan við Heklu, vestan Tindfjalla og á svæði í grennd við Þjórsá í morgun.
Þorsteinn V. Jónsson, veðurfræðingur hjá Veðurstofu Íslands, staðfestir þetta í samtali við mbl.is.
„Eldingar hófust í grennd við Hellu rétt fyrir klukkan níu í morgun og stóðu yfir í tæpan klukkutíma,“ segir hann.
Gul viðvörun er í gildi á Suðurlandi fram til hádegis og mikið hefur rignt þar í allan dag, en öflug skil og uppstreymi hafa valdið þrumuveðrinu. Veðurfræðingur segir lítið hvassviðri vera á svæðinu þrátt fyrir talsverða rigningu.