Móttökustöðin skapað umferð, öngþveiti og slysahættu

Ásdís Kristjánsdóttir, bæjarstjóri Kópavogsbæjar, segir bæjarbúa Kópavogs ekki þurfa að óttast að geta ekki losað sorpið sitt þótt móttökustöð Sorpu á Dalvegi í Kópavogi verði lokað. Staðsetningin hafi nokkra ókosti í för með sér, svo sem öngþveiti og slysahættu.

„Þessi ákvörðun tekur ekki gildi fyrr en í september 2024. Í millitíðinni ætlum við að byggja upp grenndarstöðvar í hverfum Kópavogs,“ segir Ásdís. 

Frétt af mbl.is

Móttökustöð Sorpu fleygt út úr Kópavogi

Ekki í samræmi við gildandi skipulag

Hún segir veru móttökustöðvarinnar hafa skapað mikla umferð með tilheyrandi öngþveiti og slysahættu. Starfsemin sé ekki í samræmi við gildandi aðalskipulag sem gerir ráð fyrir verslun og þjónustu á svæðinu.

Stöðin sé þá staðsett við Kópavogsdal, eina af perlum bæjarins. „Bæjarbúar hafa kallað eftir því að þarna verði fjölbreytt þjónusta fyrir gangandi og akandi. Við erum að hlusta á þau sjónarmið og vinna samkvæmt gildandi stefnu bæjarins,“ segir hún. Mikilvægt sé að þar verði aðgengi að verslun og þjónustu.

Lóðinni úthlutað til bráðabirgða árið 1991

Í samstarfssamningi meirihlutans í Kópavogi stendur að hugað yrði að flutningi Sorpu en vera móttökustöðvarinnar á Dalvegi er ekki samkvæmt aðalskipulagi bæjarins.

Jón Viggó Gunnarsson, framkvæmdastjóri Sorpu, sagðist í samtali við Morgunblaðið í gær ekki viss um að íbúar Kópavogs yrðu ánægðir með þessa tilhögun, sem hann kallaði þjónustuskerðingu.

• Blogga um frétt