Rýrir traust til stjórnvalda

Þetta segir Bjarnheiður Hallsdóttir, formaður Samtaka ferðaþjónustunnar, í samtali við Morgunblaðið um óvissustig sem almannavarnir lýstu yfir fyrir gamlársdag. Óvissustigið og veðurspá Veðurstofu höfðu þær afleiðingar að fjöldi fyrirtækja í ferðaþjónustu á Íslandi aflýsti ferðum á gamlársdag með tilheyrandi umtalsverðu fjártjóni. Óveðrið skall svo í raun aldrei á, ef svo má segja.

Bjarnheiður telur að þetta geti rýrt traust innan ferðaþjónustunnar til stjórnvalda. „Það verður svo svakalegt tjón þegar samgöngur raskast svo það má ekki gerast nema það sé rík ástæða fyrir því.“

Hún segir mikilvægt að innleiða ferðaþjónustuna í samtalið um óvissustig og innviði. Endurskoða þurfi hvernig þessu sé háttað, ráðast í stefnumótun frá grunni og mynda heildarstefnu í þessum málum.

„Það er mjög vont að loka fyrir fram áður en öruggt er að veðrið skelli á. Það þarf að tryggja upplýsingaflæði.“ Hún bætir við að auðvitað eigi öryggi ferðamanna að vera í fyrsta sæti.