Fallið hefur verið frá fyrirhuguðu útgöngubanni katta að næturlagi á Akureyri. Þetta ákvað meirihluti bæjarstjórnar fyrir jól að sögn Heimis Arnar Árnasonar, forseta bæjarstjórnar.
Í nóvember árið 2021 samþykkti meirihlutinn að banna alfarið lausagöngu katta í bænum frá og með 1. janúar 2025.
Nokkrum mánuðum síðar var hins vegar ákveðið að lausagangan yrði aðeins bönnuð að næturlagi, frá miðnætti og til sjö á morgnana.
Var þessi ákvörðun meðal annars tekin fyrir í síðasta áramótaskaupi og gert grín af því að erfitt væri að kenna köttum á klukku.
En eins og áður sagði var ákvörðunin tekin fyrir jól og segir Heimir því í samtali við mbl.is að skaupið hafi ekki haft áhrif á ákvörðunina.
Hann segir að lítið hafi verið aðhafst í málinu í bæjarstjórn og því ákveðið að falla frá ákvörðuninni í bili.