„Þetta hefur ekki verið mikið notað í gegnum tíðina, þessu hefur verið hótað mörgum sinnum en þegar á reynir þá verður alltaf minna úr þessu,“ segir Lára V. Júlíusdóttir, hæstaréttarlögmaður og sérfræðingur í vinnurétti, um beitingu verkbanns í kjaradeilum. Hún telur að um 35 ár séu síðan verkbönnunum var síðast beitt að einhverju ráði.

Frétt af mbl.is

Leggja til verkbann á Eflingu

Stjórn Samtaka atvinnulífsins (SA) samþykkti einróma að leggja það til við aðildarfyrirtæki sín að setja allsherjarverkbann á Eflingu, en atkvæðagreiðsla hófst klukkan 11 í dag og stendur yfir til klukkan 16 á miðvikudag.

Verði verkbann samþykkt tekur það gildi á hádegi 2. mars. Þá mega rúmlega 20 þúsund manns sem starfa eftir kjarasamningum Eflingar og SA á almennum vinnumarkaði, ekki sækja vinnu og fá ekki greidd laun.

Undanþágunefnd væntanlega sett á laggirnar 

Lára segir að í raun sé um að ræða spegilmynd af verkfalli þar sem sömu reglur gildi nema með öfugum formerkjum.

Á vef ASÍ segir um framkvæmd verkbanns að meginskyldur aðila samkvæmt ráðningarsamningi falli niður þann tíma sem verkbann vari en taki gildi á ný þegar því ljúki. Engin vinna sé innt af hendi og laun ekki greidd.

Frétt af mbl.is

„Yfirmanna að útskýra þetta viðbjóðslega framferði“

„Verkbann er aðgerð sem atvinnurekandinn stjórnar og hann hefur forræði á útfærslunni að því marki sem lög heimila, alveg eins og með verkfall. Hann hlýtur að setja á laggirnar sína undanþágunefnd þar sem afgreiddar eru  óskir um hvernig fara á með neyðartilfelli og allt það,“ segir Lára.

Mögulega þarf að takast á um ákvörðun Sólveigar

Það er skýrt að atvinnurekandi greiðir ekki laun í verkbanni, enda felur verkbann í sér að launafólki er meinað að koma til vinnu og því engin vinna innt af hendi.

Sólveig Anna Jónsdóttir, formaður Eflingar, sagði í samtali við mbl.is fyrr í dag að félagsfólk Eflingar fengi heldur ekki greitt úr vinnudeilusjóði félagsins, kæmi til verkbanns. Það kemur einnig fram á heimasíðu Eflingar að engir styrkir verði greiddir úr sjóðnum, enda sé verkbann ekki á ábyrgð félagsins.

Frétt af mbl.is

Fleiri verkföll gætu fylgt

Lára segir að mögulega þurfi að takast á um þessa ákvörðun formanns Eflingar síðar og bendir á að í reglum um vinnudeilusjóði annarra stéttarfélaga, til að mynda VR og RSÍ, sé áhersla lögð á að greitt sé úr vinnudeilusjóði bæði vegna verkfalls og verkbanns.

Tilgangurinn að skapa þrýsting

Ljóst er að komi til verkbanns mun það hafa töluvert meiri áhrif en verkföll Eflingarfólks, enda nær verkbannið til allra hópa sem heyra undir kjarasamninga Eflingar og SA, en ekki bara þá sem eru í verkfalli. Halldór Benjamín Þorbergsson, framkvæmdastjóri SA, sagði í samtali við Morgunblaðið í dag að um væri að ræða algjört neyðarúrræði. Tilgangurinn er að skapa þrýsting á Eflingu að ljúka yfirstandandi kjaraviðræðum, en uppúr þeim slitnaði í gær eftir að ljóst var að of langt var á milli deiluaðila.

Frétt af mbl.is

Viðræðum SA og Eflingar slitið

Frétt af mbl.is

„Ég ligg bara undir feldi“

„Í stað þess að Efl­ing lami starf­semi til­tek­inna fyr­ir­tækja og at­vinnu­greina með verk­föll­um fárra fé­lags­manna munu SA með verk­banni leit­ast við að stjórna fram­kvæmd vinnu­stöðvana og auka þrýst­ing á Efl­ingu að ljúka yf­ir­stand­andi kjaraviðræðum,“ segir í yfirlýsingu SA vegna atkvæðagreiðslu um verkbann.

Segist SA ekki geta teygt sig lengra í átt til Eflingar í samningaviðræðum án þess að kollvarpa þeim kjarasamningum sem gerðir hafi verið við önnur stéttarfélög á almennum vinnumarkaði.

Tengdar fréttir

Kjaraviðræður

Farmenn felldu nýjan kjarasamning

• Vilja hækka frítekjumörk og tekjur
• Nýr kjarasamningur Eflingar samþykktur
• Ellefu mál á borði sáttasemjara
• Vísa kjaradeilu tollvarða til gerðardóms

» Fleiri tengdar fréttir

• 1 blogg um fréttina

Bloggað um fréttina

• Hallmundur Kristinsson: Er bannað að banna bönn?