Fyrr í kvöld kviknaði eldur í íbúð í Norðurbæ Hafnarfjarðar. Töluverðar skemmdir eru á íbúðinni en lögregla vinnur nú að rannsókn málsins.
Þetta kemur fram í tilkynningu frá lögreglu.
Samkvæmt umfjöllun Vísis urðu engin slys á fólki og var eldurinn að mestu í einni íbúð fjölbýlishússins.
Hvað varðar önnur störf lögreglu í kvöld kemur fram að karlmaður hafi verið handtekinn um klukkan 18.14 grunaður um ölvunarakstur og verði vistaður í fangageymslu í nótt vegna málsins. Börn mannsins eru sögð hafa verið í bifreiðinni en vegna þessa verði málið unnið í samvinnu við barnaverndaryfirvöld.
Þá hafi áreksturinn sem að varð á Vesturlandsvegi fyrr í kvöld orðið þegar bifreið var ekið aftan á aðra kyrrstæða.
„Ökumaður kyrrstæðu bifreiðarinnar slasaðist talsvert í andliti. Ökumaður kyrrstæðu bifreiðarinnar var að bíða eftir umferð sem ekið var á móti áður en hann gat beygt út af veginum,“ segir í tilkynningunni.