Hilmar Gunnarsson hefur verið ráðinn verkefnisstjóri Hlégarðs, miðstöðvar lista- og menningarlífs í Mosfellsbæ, til næstu tveggja ára. Frá þessu er greint á vef Mosfellsbæjar.
Þar kemur fram að menningar- og lýðræðisnefnd bæjarins hafi lagt til við bæjarráð að Mosfellsbær tæki alfarið yfir starfsemi Hlégarðs frá og með 1. maí 2023. Hilmar hóf störf 1. maí. Hann er öllum hnútum kunnugur í bænum enda hefur hann ritstýrt bæjarblaðinu Mosfellingi um árabil og verið í lykilhlutverki í ýmiss konar menningarstarfsemi og uppákomum.
„Hlutverk verkefnastjóra Hlégarðs er að halda utan um og þróa viðburði og starfsemi í Hlégarði í samvinnu við menningar- og lýðræðisnefnd. Hann hefur einnig umsjón með bæjarhátíðinni Í túninu heima, hátíðarhöldum vegna 17. júní og öðrum viðburðum á vegum Mosfellsbæjar.
Eitt áhersluatriða í menningarstefnu Mosfellsbæjar er að Hlégarður sé miðstöð lista- og menningarlífs í Mosfellsbæ. Tilgangur breytinga á rekstarfyrirkomulagi Hlégarðs er að efla menningarstarfsemi í Mosfellsbæ með því að bjóða starfandi listafólki, einstaklingum, félagasamtökum og öðrum hagaðilum rými til sköpunar, samveru og viðburðahalds,“ segir á vef Mosfellsbæjar.