„Þetta er aðallega þáttur um hugmyndaríka bræður sem taka upp á ýmsum verkefnum sem þeir telja ábatasöm en virðist ekki vera mikið á bak við,“ segir Sigursteinn Másson um nýjasta þátt Sannra íslenskra sakamála, sem fjallar um zúista-bræðurna, Einar og Ágúst Arnar Ágústssyni. „Þeir eru klókir að finna pening. Það er ekki spurning.“
Í nýjasta þætti Sannra íslenskra sakamála kafar Sigursteinn djúpt í sögu trúfélagsins Zuism. Nú stendur málsmeðferð yfir vegna meintra fjársvika. Mesta áherslan í þættinum er á trúfélagið en sú saga hefst þegar bræðurnir stofna félagið Zuism árið 2015.
Nýjasti þátturinn er aðgengilegur á Storytel en lesa má meira um þáttinn í Morgunblaðinu í dag.