Veronika Steinunn Magnúsdóttir
„Það er ekkert að frétta. Það eina sem er búið að breytast fyrir mig núna er að mamma mín heimtar að ég fari í ADHD-greiningu. Annars er ég mjög góður,“ segir Ágúst Halldórsson, Eyjamaður sem sigldi á kajak til Surtseyjar.
Formleg kæra hefur borist lögreglunni í Vestmannaeyjum vegna málsins og verður Ágúst yfirheyrður á næstunni.
Aðspurður segir Ágúst lögreglu ekki hafa tekið af sér skýrslu enn þá. Eina sem hafi breyst eftir verslunarmannahelgi sé krafa móður hans um að senda hann í ADHD-greiningu en K100 ræddi við Ágúst á miðvikudaginn var. Hann segist ekki hafa neitt við það að bæta í bili.
Sjóferð Ágústs gæti haft eftirmála þar sem Umhverfisstofnun telur hana brjóta gegn 90. gr. laga um náttúruvernd, sem felur í sér refsiábyrgð vegna leyfisskyldra athafna.
Auglýsing um friðlýsingu Surtseyjar er óvenju ströng þar sem kapp er lagt á að halda lífríki eyjarinnar ósnortnu.