Magnús Tumi Guðmundsson, jarðeðlisfræðingur, segir ekki tímabært að úrskurða gosinu við Litla-Hrút lokið, það sé gert töluvert seinna.
Ef eldsumbrot tækju sig upp að nýju væri það skilgreint sem sama gosið. Það væri þá ekki nema ef gosið kæmi upp á alveg nýjum stað að hægt væri að tala um nýtt gos.
Magnús Tumi bendir á dæmi úr fortíðinni svo sem Heklugosið 1980. Þá gaus fyrst í 3 daga en í kjölfarið kom margra mánaða hlé. Gosið kom aftur upp um páskana 1981 og er það talið sami atburður, þótt nokkrir mánuðir hafi liðið á milli.
Hann segir vísindamenn hafa lítil gögn í höndunum til að geta spáð nákvæmlega í framtíðina. Þegar Kröflueldar stóðu yfir gat engin maður spáð því hvort eitthvert einstakt gos væri það síðasta eða í áframhaldandi röð fleiri gosa.
Gosið núna hafi verið í takt við önnur gos á Reykjanesskaganum, það er frekar lítið gos. Gosið í Geldingadölum 2021 teljist meðalgos á íslenskan mælikvarða. „Meginatriðið þegar við horfum á eldvirkni á Reykjanesskaga þá koma upp tímabil með frekar tíðum en ekki mjög stórum gosum. Svo koma löng tímabil með engum gosum. Sem dæmi kom um Kristnitökuhraunið í kringum árið 1000 og svo gerðist ekkert fram til 1150, það er 150 ára hlé.“
Magnús Tumi er efins að mikið sjáist frekar af framrás kviku í hrauninu sjálfu. Landslagið sé þar frekar flatt og lítill halli til að ýta undir slíka atburði.
„Við sáum það í gosinu 2021, tveimur vikum eftir að gosinu lauk, þá rann kvika frá Geldingadölum og niður brekkuna, niður í Nátthaga í um tvær vikur, á milli staða í hrauninu. Það var ekki eiginlegt eldgos heldur tilfærsla.“ Hann segir enga stóra tanka kviku vera í hrauninu sem líklegir væru til að fara af stað.
Rétt sé samt að gæta ýtrustu varkárni þegar farið er um svæðið og fara ekkert út á nýja hraunið til að byrja með. Gas geti enn safnast fyrir í dældum. „Svo er líka hitt að hraunið er sumstaðar svo gríðarlega úfið, þannig að þar er auðvelt að detta og meiða sig,“ segir Magnús Tumi Guðmundsson.