Ríkisstjórnin er „fullkomlega tilbúin“ að framlengja stuðningsúrræði fyrir Grindvíkinga sé þörf á framlengingu, að sögn Sigurðar Inga Jóhannssonar innviðaráðherra.
Þetta sagði ráðherra á íbúafundi Grindavíkur í Laugardalshöll í kvöld. Lög um húsnæðisstuðning og launastuðning fyrir Grindvíkinga renna út febrúar á næsta ári en Sigurður Ingi var spurður hvort ríkisstjórnin myndi framlengja stuðninginn.
„Við erum fullkomlega tilbúin til þess að framlengja þessi úrræði, hugsanlega eitthvað breytt og sérstaklega þegar það kemur að húsnæðisstuðningnum,“ sagði Sigurður Ingi sem benti á að auðveldara yrði að segja til um framlengingu þegar stjórnvöld væru komin með „fjölbreyttari form af búsetu“ Grindvíkinga.
„Þá gætum við skoðaða það sértækt, sem við höfðum ekki tíma til að gera núna, og [við] töldum mikilvægara einfaldlega að koma fjármununum beint til ykkar eins hratt og hægt er,“ sagði Sigurður Ingi við Grindvíkinga.