Mývatnssveitin opnaði í morgun

Árni Friðleifsson hampar 65 sentimetra urriða sem tók í brúarholunni …
Árni Friðleifsson hampar 65 sentimetra urriða sem tók í brúarholunni við Geldingaey. Hér er gleðin við völd. Ljósmynd/Aðsend

Veiði hófst í Laxá í Mývatnssveit í morgun. Það voru spenntir veiðimenn sem fóru út klukkan átta. Árni Friðleifsson lögregluþjónn og veiðimaður átti veiðisvæðið Geldingaey ásamt félaga sínum Jóhanni Jóni Ísleifssyni. Þeir byrjuðu við brúna yfir í Geldingaey og settu þar strax í fyrstu fiskana. Þeir lönduðu fimm góðum urriðum á frekar skömmum tíma.

Árni var kampakátur þegar Sporðaköst heyrðu í honum á vaktinni. „Það eru frábær skilyrði. Hlýtt og smá vindur. Við höfum ekki orðið varir við flugu enn. Það er mikill snjór í fjöllum og gróður er varla farinn að taka við sér,“ Árni var nýbúinn að landa 65 sentimetra urriða sem tók í holunni við brúna. Hann tók púpuna Beyki, sem hönnuð var af Gylfa Kristjánssyni fluguhnýtara og hönnuði. Flestir tóku fiskarnir púpur en einn kom þó á Sunray. Það leiddist Árna ekki.

Það eru átök að landa urriða af þessari stærðargráðu.
Það eru átök að landa urriða af þessari stærðargráðu. Ljósmynd/Aðsend

„Það er alveg áberandi hvað fiskurinn er vel haldinn. Mjög flottur og þykkur, þetta var fyrsti fiskurinn í morgun og hann var svaðalega flottur.“

Opnunin í Mývatnssveit er sjö vaktir og ljúka þeir veiðum á hádegi á mánudag. Árni hafði ekki heyrt af félögum sínum á öðrum svæðum en við fáum fréttir af þeim síðar í dag.

Stefndi í hörku vakt hjá þeim Árna og Jóhanni. Áttu eftir að veiða Vikin og ætluðu að enda í Brunnhellishrófinu. 

Uppfært:

Veisla í veðri og veiði

Eftir fyrri vaktina báru menn saman bækur sínar og auðvitað voru aflabrögð misjöfn. Mikil veisla var á Geirastöðum, en þeir sem veiddu þar lönduðu 25 urriðum. Árni Friðleifsson og Jóhann félagi hans lönduðu 10 í Geldingaey og stöngin á móti þeim fimmtán. Frábær veiði á fyrstu vakt á þeim svæðum sem Sporðaköst hafa heyrt frá. Veðrið hefur leikið við veiðimenn sem opna Mývatnssveitina.Hiti í lofti og aðeins vindur. Allt eins og best verður á kosið.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
104 cm Svalbarðsá Viggó Júlíusson 6. júlí 6.7.
104 cm Nesveiðar Hugo 29. júní 29.6.
104 cm Nesveiðar Aron Pálmarsson 27. júní 27.6.
107 cm Nesveiðar Hilmar Hafsteinsson 25. júní 25.6.
101,5 cm Laxá í Kjós Guðjón Þ. Guðjónsson 23. júní 23.6.
101 cm Blanda Pétur Pálsson 21. júní 21.6.
101 cm Víðidalsá James Murray 20. júní 20.6.

Skoða meira