Veiði | mbl | 5.10.2021 | 7:34 | Uppfært 9:27

Fjörutíu fiska dagur í Tungulæk

Magnús Már Magnússon, til hægri setti í og landaði þessari 95 sentímetra sleggju í Tungulæk. Honum til aðstoðar var Marius sem hér lyftir þessum vel vaxna sjóbirtingi. Ljósmynd/TKE

Það hafa komið frábærir dagar í sjóbirtingnum fyrir austan. Einn sá stærsti sem frést hefur af í haust er 1. október. Þann dag lönduðu veiðimenn í Tungulæk 41 sjóbirtingi á bilinu 40 til 85 sentímetrar. Mikið var um fisk á bilinu 40 til 45 sentímetrar og er gott að sjá að yngri kynslóðir eru sterkar.

Veiðistaðirnir Holan, Faxi, Súddi og Vatnamótin gáfu fína veiði. Hollið landaði samtals sextíu fiskum og var sá stærsti 95 sentímetrar. Það er ótrúleg skepna þegar verið er að tala um silung.

Flugur á borð við Green Dumm og Black Ghost ásamt púpunni Copper John gáfu allar vel. Daginn eftir veiddust tíu birtingar og þann þriðja voru þeir sextán talsins. Þetta er mokveiði og á pari við það sem við sögðum frá úr Eldvatninu í síðustu viku.

Stærð styrtlunnar leynir sér ekki. Þetta er gamalreyndur hængur sem mætt hefur nokkrum sinnum áður í Tungulæk. Ljósmynd/TKE

Þessar ár eru líka í næsta nágrenni hvor við aðra. Áhyggjur manna af viðvarandi vandræðum vegna Skaftárhlaups á svæðinu dvínuðu jafn hratt og hlaupvatnið sjálft enda varð ekki mikið úr þessu hlaupi. Það óx í ánum en þær voru veiðanlegar allan tímann. Fram undan eru skemmtilegir dagar í birtingnum því flestar ár á þessum slóðum hafa opið fram til 20. október.

Seinustu hundraðkallar sumarsins

Lengd á laxi	Veiðisvæði	Veiðimaður	Dagsetning Dags.
102 cm	Hvítá við Iðu	Ársæll Þór Bjarnason	19. september 19.9.
101 cm	Víðidalsá	Stefán Elí Stefánsson	4. september 4.9.
101 cm	Laxá í Dölum	Hafþór Jónsson	27. ágúst 27.8.
102 cm	Haukadalsá	Ármann Andri Einarsson	23. ágúst 23.8.
103 cm	Laxá í Aðaldal	Birgir Ellert Birgisson	12. ágúst 12.8.
103 cm	Miðsvæði Laxá í Aðaldal	Máni Freyr Helgason	11. ágúst 11.8.
101 cm	Laxá í Aðaldal	Agnar Jón Ágústsson	10. ágúst 10.8.