Það verður nóg af lesefni fyrir veiðimenn um jólin. Bókin Dagbók urriða er væntanleg í verslanir í lok nóvember. Höfundur er Ólafur Tómas Guðbjartsson og hefur hann fyrir nokkru skráð heitið Dagbók urriða kyrfilega í huga veiðimanna. Hann gerði eftirminnilega sjónvarpsþætti undir sama heiti og hefur gert hlaðvarpsþætti og fjöldann allan af færslum undir þessu sama nafni á samfélagsmiðlum. Við náðum tali af Ólafi eftir að hann vakti athygli á bókinni. Hvernig bók er þetta, fyrir utan að vera augljóslega veiðibók?
„Dagbók urriða er í raun veiðidagbókin mín síðastliðin þrjátíu ár. Í bókinni skrifa ég á gamansaman hátt um reynslu mína sem silungsveiðimaður, sigra og sorgir, mistök og lærdóm, ásamt því að kafa ofan í pælingar um hegðun fiska, náttúruna og lífríki hennar, sagnfræði, atferli veiðimanna ásamt öðru skemmtilegu og fræðandi efni. Ég lagði upp með að skrifa bók sem væri fyndin en í senn fræðandi. Bók sem hægt væri að flissa yfir upp í sófa um jólin,“ sagði rithöfundurinn í samtali við Sporðaköst.
Dagbók urriða kemur í verslanir í lok nóvember. Forlagið Salka gefur út bókina, enda annálaðar veiðikonur sem þar halda um stjórnartaumana og brenna fyrir sportið, eins og Ólafur Tómas orðar það.
„Ég ætla að vera duglegur að kynna bókina og setja saman viðburði fyrir veiðimenn til þess að hittast, spjalla og hafa gaman er nær dregur útgáfudegi,“ sagði rithöfundurinn.
Það verður nóg að lesa fyrir veiðimenn um jólin. Eins og komið hefur fram er bókin Gengið til rjúpna, eftir Dúa Landmark þegar komin í verslanir og jafnvel er von á fleiri bókum.
Lengd á laxi | Veiðisvæði | Veiðimaður | Dagsetning Dags. |
---|---|---|---|
100 cm | Mýrarkvísl | Tim Racie | 23. júlí 23.7. |
102 cm | Víðidalsá | Ragnheiður Þengilsdóttir | 14. júlí 14.7. |
106 cm | Laxá í Aðaldal | Kristrún Ólöf Sigurðardóttir | 8. júlí 8.7. |
100 cm | Blanda | Patrick Devennie | 20. júní 20.6. |
100 cm | Kjarrá | Sigurður Smári Gylfason | 19. júní 19.6. |
Veiðiárið 2023: | |||
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |