Laxá í Leirársveit í útboð

Glímt við lax í Laxfossi í Laxá í Leirársveit.
Glímt við lax í Laxfossi í Laxá í Leirársveit. laxaileir.is

Veiðiréttur í Laxá í Leirársveit verður boðinn út frá og með sumrinu 2023. Félagið Sporðablik sem er með ána á leigu og hefur verið í fjöldamörg ár, er með samning út næsta sumar. Á félagsfundi sem haldinn var síðasta dag nóvember mánaðar var samþykkt að auglýsa veiðirétt í Laxá og vötnin í Svínadal þar sem leitað verði eftir „samstarfsaðila um markaðssetningu og sölu veiðileyfa á öllu vatnasvæði Laxár frá og með árinu 2023,“ eins og segir í tillögunni sem samþykkt var á félagsfundinum.

Hallfreður Vilhjálmsson formaður veiðifélags Laxár í Leirársveit staðfesti þetta í samtali við Sporðaköst. Stjórn veiðifélagsins á eftir að koma saman og útfæra nánar hvernig framkvæmdinni verður háttað en ljóst er að áin og veiðisvæðið í heild sinni verður auglýst á nýju ári.

Breskur veiðimaður þreytir lax í Miðfellsfljóti í Laxá í Leirársveit.
Breskur veiðimaður þreytir lax í Miðfellsfljóti í Laxá í Leirársveit. Morgunblaðið/Einar Falur

Hallfreður telur raunhæft að auglýsing um leiguna verði birt í febrúar án þess að nákvæm tímasetning liggi fyrir. Hann segir þó að þegar hafi áhugasamir aðilar sett sig í samband við veiðifélagið vegna þessa.

Laxá í Leirársveit skilaði 850 löxum í sumar og er það besta veiði í ánni frá árinu 2015 þegar veiðin var 1.121 lax. Miklar sveiflur hafa verið í veiðinni í Leirársveit undanfarin ár og fór hún niður í 300 laxa þurrkasumarið 2019.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
100 cm Fossá Guðbjörn Gunnarsson 1. október 1.10.
101 cm Víðidalsá Nils Folmer Jörgensen 26. september 26.9.
104 cm Laxá í Dölum Sigurður Smárason 25. september 25.9.
100 cm Miðfjarðará Róbert G. Grímsson 24. september 24.9.
104 cm Stóra Laxá Rúnar Gauti Guðjónsson 23. september 23.9.
102 cm Víðidalsá/Fitjá Nils Folmer Jörgensen 19. september 19.9.
100 cm Eystri-Rangá Hannes Gústafsson 14. september 14.9.

Skoða meira