Hann Robert Taubman átti draumaaugnablikið í gær þegar 103 sentímetra hrygna tók svarta Sunrayinn hans í Grundarhorninu í Laxá í Aðaldal. Leiðsögumaður með honum var Árni Pétur Hilmarsson, Nesmaður og einn af rekstraraðilum Laxár.
Myndin af Robert með laxinn er gulls ígildi. Brosið er nánast endalaust og þessi langa og mikla hrygna var stífmæld af Árna Pétri. „Kallinn var bara ekki að ná að halda henni almennilega og böglaðist alltaf í höndunum á honum,“ hló Árni Pétur þegar við spurðum hann út í mælinguna.
Þetta er fjórði hundraðkallinn sem veiðist í Aðaldal í sumar og annar laxinn sem mælist 103 sentímetrar. Það er mun sjaldgæfara að hrygnur verði svo stórar og því setjum við hana skör ofar en hænginn sem veiddist í Fosspolli þann 19. júlí og var líka skráður 103 sentímetrar.
Reyndur veiðimaður hafði samband við Sporðaköst og taldi ótækt að hrygnur féllu í flokkinn hundraðkallar ef þær ná hundrað sentímetrum eða meira. Vildi hann að þær yrðu kallaðar fjallkonur. Þeirri hugmynd var hafnað.
Enn og aftur hvetjum við veiðifólk og þá ekki síst leiðsögumenn til að vanda til mælinga og myndtöku á þessum merkisfiskum sem ná hundrað sentímetrum. Sporðköstum hafa borist myndir af fiskum sem hafa verið mældir í þessari stærð, en vantað hefur vitni til að staðfesta mælingu. Þá eru fiskarnir ekki lengur skráðir á hundraðkallalistann.
Hafandi skrifað þetta hvetjum við fólk til að halda áfram að senda okkur myndir af þessum allra stærstu fiskum Íslands.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |