Kaldir litir í undurfallegu dönsku eldhúsi

Við höfum loks fundið hið fullkomna bleika eldhús. Það er vissulega bleikt en ekki væmið eða yfirgnæfandi. Mig hefur lengi dreymt um bleikt eldhús en hingað til hef ég ekki fundið lit sem ég myndi vilja sýna sambýlismanninum, en hér er hann kominn. Ískaldur og fölbleikur litur sem kallast svo fallega á við marmarann og hlýlegt viðargólfið í þessari guðdómlegu dönsku íbúð.

Blái liturinn á ganginum kallast skemmtilega á við bleika litinn í eldhúsinu. Hvort tveggja eru kaldir litir en ljóst viðargólfið gefur íbúðinni hlýjan tón á móti.

Stílhrein falleg innréttingin nær til lofts, nýtir því plássið vel og skilur ekki eftir leiðinlegt rými fyrir ofan innréttinguna sem gerir ekkert annað en að safna ryki. Takið eftir hvað listaverkið á veggnum í eldhúsinu og spegillinn gefa rýminu mikinn stíl og um leið gera eldhúsið hlýlegra. 

Einstaklega fallegt eldhús sem sýnir svo glögglega að bleikt er ekki bara bleikt.