Sómahjónin á bak við GOTT veitingastaðina og Heilsurétti fjölskyldunnar, þau Sigurður Gíslason og Berglind Sigmarsdóttir eru að opna splunkunýjan veitingastað í Vestmannaeyjum.
Að þessu sinni er það alvöru ítalskur pítsastaður en stefnt er að því að opna í næstu viku og bíða Eyjamenn að öllum líkindum spenntir eftir þessari viðbót í veitingaflóru eyjunnar.
Meðeigendur þeirra hjóna eru Theódóra Ágústsdóttir og Anton Örn Eggertsson.
Hér gefur að líta nokkrar myndir af staðnum sem er að taka á sig mynd. Byrjað er að prufukeyra ofninn góða sem er sérinnfluttur frá Ítalíu og vegur 2,6 tonn.
Matarvefurinn mun að sjálfsögðu fylgjast nánar með þróun mála en staðurinn hefur hlotið nafnið Pítsugerðin.