Aðdáendur Kim Kardashian voru þeirrar gæfu aðnjótandi að fá sérlega skoðunarferð um eldhús Kardashian-West fjölskyldunnar á heimili hennar í Los Angeles.

Húsið sem þau búa í (sem er með því flottara sem sést hefur) er með ógnarstóru eldhúsi enda ekki vanþörf á. Kim hafði deilt mynd af kæliskápnum sínum á dögunum og uppskar mikla gagnrýni fyrir að vera bara með drykki í ísskápnum en engan mat og veltu gárungarnir því fyrir sér hvað fjölskyldan borðaði eiginlega.

Kim svaraði fyrir sig með ógleymanlegri skoðunarferð um eldhús heimilisins og þar kom í ljós að margir kæliskápar eru í notkun, bæði frystar og kælar og búrskápar og allt þar á milli. Allt tandurhreint og vel skipulagt og ljóst að margir eiga eftir að andvarpa af öfund við að sjá þessa dásemd.