Í tilefni þess að íslenska selleríið er komið í verslanir erum við hér með uppskrift að dýrindis kartöflusalati úr smiðju Nönnu Rögnvaldardóttur.
Hér er á ferðinni heitt kartöflusalat með selleríi og beikoni sem ætti að slá í gegn við hvaða matarborð sem er enda elskum við fátt heitar en gott meðlæti.
Heitt kartöflusalat með selleríi og beikoni
- 500 g kartöflur, helst litlar
- 100 g beikon
- 3 msk. ólífuolía
- 1 stöngull sellerí
- nýmalaður pipar
- salt
- 1 msk. vínedik
- 1 tsk. dijonsinnep
- 2 msk. rauðlaukur, saxaður smátt
Leiðbeiningar:
- Sjóddu kartöflurnar þar til þær eru nærri alveg meyrar.
- Helltu þá vatninu af þeim og skerðu þær í helminga eða fjórðunga, eftir stærð.
- Skerðu beikonsneiðarnar í bita og steiktu það á pönnu þar til það er stökkt. Taktu það þá af með gataspaða og settu í skál.
- Bættu olíu á pönnuna og settu kartöflurnar á hana. Steiktu þær við góðan hita í nokkrar mínútur. Lækkaðu þá hitann, bættu mestöllu selleríinu á pönnuna, kryddaðu með pipar og svolitlu salti og láttu krauma í nokkrar mínútur í viðbót; hrærðu oft í kartöflunum.
- Taktu þær svo upp með gataspaða og settu í skálina með beikoninu. Helltu feitinni af pönnunni í litla skál og þeyttu ediki, sinnepi og rauðlauk saman við.
- Helltu yfir kartöflurnar, bættu við afganginum af selleríinu og blandaðu vel.