Matur | mbl | 29.10.2022 | 18:01

Hamborgarinn sem gæti sett allt á hliðina

Sjúklega girnilegur hamborgari - það verður að segjast. mbl.is/Jamie Oliver

Við leggjum ekki meira á ykkur en þennan girnilega börger, sem á eftir að kveikja í öllum bragðlaukunum og bjarga helginni svo ekki sé minna sagt. Hver og einn getur margfaldað uppskriftina eftir þörfum - eftir því hversu margir eru í mat.

Þetta er hamborgi helgarinnar

3 kastaníusveppir
125 g nautahakk
2 beikonstrimlar
1 hamborgarabrauð
2 kúfaðar teskeiðar af sýrðum rjóma
Gúrka (súrar gúrkur ef vill)
25 g cheddar ostur
1 msk. Worcestershire sósa

Aðferð:

Snyrtið sveppina og steikið á háum hita með skurðarhliðina niður á við, á stórri pönnu.
Skiptið hakkinu upp í tvær jafnstórar kúlur og fletjið hvora út í sirka 1/2 cm þykkt. Setjið beikon á hvora kúlu. Setjið hamborgarana á pönnuna með beikonhliðina niður á við og stráið klípu af sjávarsalti og svörtum pipar yfir. Steikið í 2 mínútur og snúið þá við og steikið áfram í 1 mínútu.
Hitið brauðið snögglega á pönnunni og setjið á disk. Setjð sýrða rjómann á brauðið og hamborgarann og sveppina þar ofan á.
Hitið rifinn cheddar ostinn á pönnunni (í sirka þeirri stærð sem hamborgarinn) og hellið Worchestershire sósunni yfir. Setjið ostinn ofan á borgarann, því næst koma gúrkurnar og brauðlokið á hamborgarann.

Uppskrift: Jamie Oliver