Matur | Jólauppskriftir KYNNING | 10.12.2021 | 14:07 | Uppfært 14:37

Kengúra með camembert-fylltum kartöflum og villisveppasósu

Kristinn Magnússon

Hér erum við með dásamlega máltíð sem tikkar í öll box. Kengúran kemur skemmtilega á óvart – er bæði bragðmikil og meyr. Meðlætið er svo alveg upp á tíu og fremstar þar í flokki eru Camembert kartöflurnar sem þið verðið að prófa.

Uppskriftin birtist fyrst í Hátíðarmatarblaði mbl og Hagkaups sem helgað var villibráð að þessu sinni.

Kengúra með camembert-fylltum kartöflum og villisveppasósu

Kengúra

500 g kengúra
2 stk. hvítlauksgeirar – kramdir
4 greinar timían
Olía
Smjör
Salt og pipar

Aðferð:

Kengúran þerruð, söltuð og pipruð. Þá er panna hituð upp með olíu og þegar hún er orðin vel heit er kengúran sett á hana og steikt í um það bil mínútu, þá er henni snúið við og smjörinu, timíaninu og hvítlauknum bætt út á og steikt í aðra mínútu.
Sett í eldfast mót með smjörinu og kláruð í ofni á 180°C þar til kjarnhiti nær 55°C, en bitarnir eru mjög misstórir og því erfitt að segja til um eldunartíma.
Hún er að lokum látin standa í að minnsta kosti 5 mínútur áður en hún er skorin.

Aspas með kirsuberjatómötum og geitaosti

2 búnt aspas
1 box kirsuberjatómatar
½ -1 stk. geitaostrúlla
1 ½ msk. balsamik-edik
Smjör
Salt og pipar

Aðferð:

Byrjað er á því að brjóta endana af aspasnum. Þá er hann steiktur á lágum hita á pönnu með smjöri og salti í um það bil 4 mínútur. Tómatarnir eru skornir í ferninga og dressaðir með balsamik-edikinu, salti og pipar.
Aspasinn er settur á plötu eða í eldfast mót, tómatarnir yfir hann og bakað í ofni á 180°C í um það bil 10 mín.
Um leið og aspasinn er tekinn út úr ofninum er geitaosturinn brotinn yfir og leyft að bráðna.

Camembert-fylltar kartöflur

4 stk. bökunarkartöflur
6 sneiðar beikon
200 g rjómaostur
150 g steyptur camembert-ostur
1 dl rifinn Feykir-ostur
2 tsk. ítölsk hvítlauksblanda
Salt og pipar

Aðferð:

Kartöflur bakaðar á 200°C í um það bil 60 mínútur, eða þar til þær eru mjúkar í gegn.
Á meðan er beikonið skorið í litla bita og steikt þar til stökkt. Camembert og Feykir-osturinn er rifinn niður á grófu rifjárni, blandað saman við rjómaostinn, hvítlauksblönduna og beikonið, blandan er þá söltuð og pipruð.
Stór kross er skorinn í kartöfluna og hún kreist svo hún opnist vel, þá er ostablandan sett ofan í kartöfluna og bakað í 5 mínútur í viðbót.

Villisveppasósa

30 g þurrkaðir villisveppir
250 g kastaníusveppir
2 dl rauðvín
5 dl rjómi
Villibráðarkraftur
Salt

Aðferð:

Leggið þurrkaða sveppi í bleyti í volgt vatn í 20 mínútur, sigtið þá vatnið frá, þerrið þá og skerið smátt. Kastaníusveppirnir eru skornir í sneiðar og steiktir á pönnunni ásamt þessum þurrkuðu.
Þegar sveppirnir eru steiktir er rauðvíninu hellt út á og látið sjóða vel niður, þá er rjómanum bætt út á og hann einnig látinn sjóða aðeins niður, gott er að smakka sósuna þarna hvort það vanti aðeins villikraft út í hana og eða smá salt. Má þykkja með maizena-mjöli ef þarf.