Enska knattspyrnufélagið Liverpool tilkynnti í dag að skrifað hefði verið undir langtímasamning við Jayden Danns.
Hann varð 18 ára gamall í janúar en hefur slegið í gegn með liði Liverpool síðustu vikurnar. Í síðasta mánuði spilaði Danns sinn fyrsta úrvalsdeildarleik þegar hann kom inn á í leik gegn Luton. Hann lék úrslitaleik deildabikarsins gegn Chelsea, þar sem Liverpool varð deildabikarmeistari, og skoraði síðan tvö mörk í sigri Liverpool á Southampton í bikarkeppninni.
Danns hefur verið í röðum Liverpool frá átta ára aldri. Hann á að baki níu leiki með yngri landsliðum Englands.
Danns kemur úr íþróttafjölskyldu. Neil Danns faðir hans lék 582 deildaleiki á ferlinum, spilaði með Blackburn og Birmingham í úrvalsdeildinni og lék 25 landsleiki fyrir Guyana, ásamt því að vera spilandi knattspyrnustjóri Macclesfield um skeið.
Afi hans, sem einnig heitir Neil Danns, vann Evrópumeistaratitil á hjólabretti ásamt því að vera í bakraddasveit Bretlands í Eurovision árið 1987.