Fótboltamaðurinn Viðar Örn Kjartansson og sálfræðineminn Thelma Rán Óttarsdóttir hafa sett glæsilegt hús sitt á sölu. Húsið er við Perlukór í Kópavogi og einstakt á margan hátt. Húsið er 290 fm að stærð og var byggt 2007.
Húsið er teiknað af Kurt og Pí arkitektum og hverfist um innigarð sem myndar gegnsæi milli hæða og dreifir birtu um rýmin. Húsið hefur verið tilnefnt til alþjóðlegra hönnunarverðlauna sem kemur ekki á óvart því hönnunin er engu lík.
Eldhúsið er einstaklega fallegt. Það er með fjölmörgum skápum og skúffum en þar mætast eik og burstað stál. Hnausþykk borðplata er á eyjunni sem gerir hönnunina einstaklega fallega.
Við hlið eldhússins er borðstofuborð og svo tekur stofan við. Úr þessu rými er hægt að labba beint út í garð í gegnum risastóra rennihurð.
Eins og sjá má á myndum á fasteignavef mbl.is er fegurðin mikil. Ef þú þráir að búa í hönnunarparadís þá er þetta hús eitthvað fyrir þig.