Sif Atladóttir var fyrirliði íslenska kvennalandsliðsins í knattspyrnu í dag þegar það beið lægri hlut fyrir Noregi, 1:2, í vináttulandsleik á La Manga á Spáni.
Sif lék sinn 70. landsleik og var fyrirliði í fyrsta skipti. Faðir hennar, Atli Eðvaldsson, var fyrirliði í sínum 70. og síðasta landsleik fyrir Íslands hönd árið 1991, rétt eins og í mörgum þar á undan.
Væntanlega eru engin fordæmi fyrir því í heiminum að feðgin hafi bæði verið fyrirliðar landsliðs þjóðar sinnar í 70. landsleiknum.
Fyrirliðabandið hefur víðar komið við í fjölskyldunni því Jóhannes Eðvaldsson, bróðir Atla, var landsliðsfyrirliði Íslands um árabil.