Aníta Ýr Þorvaldsdóttir, 19 ára kantmaður Stjörnunnar, var besti leikmaður Bestu deildar kvenna í fótbolta í septembermánuði samkvæmt einkunnagjöf Morgunblaðsins, M-gjöfinni.
Aníta kom mjög öflug inn í lið Stjörnunnar í sjö síðustu leikjum liðsins á Íslandsmótinu. Í leikjunum fimm sem Garðabæjarliðið spilaði í september fékk hún samtals 6 M fyrir frammistöðu sína auk þess að vera valin í lið umferðarinnar í þremur síðustu umferðum deildarinnar.
Tveir aðrir leikmenn fengu 6 M í september en það voru Þórdís Hrönn Sigfúsdóttir, Íslandsmeistari með Val, og Agla María Albertsdóttir úr Breiðabliki. Þá fengu fimm leikmenn 5 M eins og sjá má á úrvalsliði septembermánaðar á íþróttasíðum Morgunblaðsins í dag.