Jürgen Klopp, knattspyrnustjóri Liverpool, færði stuðningsmönnum félagsins gleðifréttir á blaðamannafundi í dag.
Klopp var spurður út í stöðuna hjá bakverðinum Andrew Robertson, sem meiddist í landsleik Skotlands og Norður-Írlands á þriðjudaginn var.
„Hann æfir ekki í dag, en þetta eru ekki alvarleg meiðsli. Það eru góðar fréttir,“ sagði Þjóðverjinn.
Robertson meiddist á ökkla og var óttast að hann gæti orðið frá keppni í einhvern tíma. Nú er hins vegar ljóst að hann snýr aftur fyrr en í fyrstu var óttast.