Brasilía fer vel af stað í knattspyrnu í karlaflokki á Ólympíuleikunum í Tókýó því Suður-Ameríkuþjóðin vann 4:2-sigur á Þýskalandi í fyrsta leik liðanna í dag.
Richarlison, sóknarmaður enska liðsins Everton, gerði sér lítið fyrir og skoraði þrennu í fyrri hálfleik og kom Brasilíu í 3:0. Nadiem Amiri minnkaði muninn á 57. mínútu, en Maximilian Arnold fékk sitt annað gula spjald og þar með rautt.
Þrátt fyrir það gáfust tíu Þjóðverjar ekki upp því Ragnar Ache minnkaði muninn enn frekar á 84. mínútu. Paulinho átti hins vegar lokaorðið fyrir Brasilíu því hann gulltryggði 4:2-sigur með marki í uppbótartíma.
Ástralía gerði sér lítið fyrir og vann Argentínu, 2:0. Lachian Wales og Marco Tilio skoruðu mörkin. Þá unnu heimamenn í Japan 1:0-sigur á Suður-Afríku og Rúmenía vann Hondúras, 1:0.