Elías Rafn Ólafsson og Patrik Sigurður Gunnarsson, tveir af þremur landsliðsmarkvörðum Íslands í síðustu verkefnum karlalandsliðsins í fótbolta, fögnuðu sigrum með félagsliðum sínum í kvöld.
Elías og félagar í Mafra lögðu Torreense að velli, 2:1, í portúgölsku B-deildinni. Litlu munaði að Elías næði að halda hreinu en Torreense náði að minnka muninn undir lok leiksins.
Mafra er í áttunda sæti af átján liðum í deildinni þegar sjö umferðum er ólokið en er fjórtán stigum frá því að komast í umspil.
Patrik og félagar í Viking frá Stavanger hófu tímabilið í Noregi með því að sigra Sarpsborg á heimavelli í fyrstu umferð úrvalsdeildarinnar, 1:0. Sigurmarkið var sjálfsmark undir lok fyrri hálfleiks.