Sigtryggur Daði Rúnarsson og hans nýju samherjar hjá Lübeck-Schwartau unnu í kvöld sinn annan sigur í fyrstu þremur umferðum þýsku B-deildarinnar í handknattleik.
Þeir unnu Dessauer á heimavelli, 30:24, og eru því með fjögur stig eftir þrjá fyrstu leiki sína, og deila toppsæti deildarinnar með Nordhorn, Hamm og Essen. Sigtryggur Daði skoraði þrjú mörk í leiknum en hann kom til félagsins frá Balingen í sumar.
Oddur Gretarsson skoraði fjögur mörk, öll úr vítaköstum, fyrir Balingen sem tapaði 22:21 fyrir Hamm á útivelli. Balingen er með tvö stig eftir fyrstu þrjá leiki sína í deildinni.