Selfoss vann afar góðan 28:24-sigur á Valsmönnum í toppslag Olísdeildar karla í handbolta í kvöld. Staðan í leikhléi var 10:10 og var jafnræði með liðunum framan af í síðari hálfleik.
Leikurinn var jafn í fyrri hálfleik en spennustigið nokkuð hátt og mikið um mistök hjá báðum liðum. Selfoss hafði frumkvæðið og hélt lengi tveggja marka forystu en Valur skoraði síðustu tvö mörkin í fyrri hálfleik og staðan var 10:10 í leikhléi.
Markverðir liðanna voru í stuði í fyrri hálfleik en Pawel Kiepulski varði 13 skot í marki Selfoss og Daníel Freyr Andrésson 10 fyrir Val. Markaskorunin dreifðist hins vegar á marga menn en Elvar Örn Jónsson, Haukur Þrastarson og Vignir Stefánsson voru allir með 3 mörk þegar leikurinn var hálfnaður.
Baráttan hélt áfram í seinni hálfleik þangað til slökknaði á vallarklukkunni þegar tuttugu mínútur voru eftir. Um leið slökknaði á Valsmönnum og eftirleikurinn var auðveldur fyrir frábæra Selfyssinga. Selfoss gerði 6:1 áhlaup og breytti stöðunni úr 17:17 í 23:18 á skömmum tíma. Eftir það var ekki spurning hvoru megin sigurinn myndi lenda.
Elvar Örn og Haukur skoruðu 6 mörk fyrir Selfoss og Hergeir Grímsson 5. Pawel varði 17 skot í leiknum. Anton Rúnarsson skoraði 6/2 mörk fyrir Val og Vignir 5. Daníel Freyr náði sér ekki á strik í markinu í seinni hálfleik og varði 11 skot í heildina.