Viggó Kristjánsson átti góðan leik fyrir Stuttgart þegar liðið vann eins marks útisigur gegn Bergischer í þýsku 1. deildinni í handknattleik í dag.
Leiknum lauk með 31:30-sigri Stuttgart en Viggó skoraði fimm mörk í leiknum og var næstmarkahæstur í liði Stuttgart.
Arnór Þór Gunnarsson var ekki í leikmannahóp Bergischer sem er með 35 stig í ellefta sæti deildarinnar en Stuttgart er í fjórtánda sætinu með 31 stig.
Þá tryggði Balingen sæti sitt í deildinni með 30:26-heimasigri gegn Hannover-Burgdorf en Oddur Gretarsson var ekki í hóp hjá Balingen sem er með 29 stig í fimmtánda sætinu, fimm stigum frá fallsæti þegar einni umferð er ólokið.
Ludwigshafen, sem er í sautjánda sætinu og fallsæti, er með 24 stig og getur ekki náð Balingen að stigum þrátt fyrir að eiga leik til góða á Balingen.
Flensburg endurheimti toppsæti deildarinnar með 27:26-útisigri gegn Erlangen en Alexander Petersson var ekki í leikmannahóp Flensubrg sem er með 66 stig í efsta sæti deildarinnar, stigi meira en Kiel, sem á leik til góða á Flensburg.
Þá töpuðu Guðmundur Þórður Guðmundsson og lærisveinar hans með þriggja marka mun gegn Füchse-Berlin á heimavelli, 32:25, en Arnar Freyr Arnarsson komst ekki á blað hjá Melsungen sem er með 40 stig í sjöunda sæti deildarinnar.