Danir eru ánægðir með gengi sinna manna í amerísku NHL-deildinni í íshokkíi en um leið áhyggjufullir. Íþróttin hefur verið í mikilli sókn í Danmörku og nú er svo komið að Danir eiga sjö leikmenn í NHL, sterkustu deild í heimi.
TV2 segir frá því að fimm þeirra sjö séu komnir með sæti í úrslitakeppninni með sínum liðum og líkur á að þeir verði sex. Einn þessara leikmanna er Lars Eller hjá Washington Capitals, en hann er sonur Olafs Ellers sem var landsliðsþjálfari Íslands um tveggja ára skeið.
Þessi velgengni Dana í NHL flækir málin varðandi danska landsliðið, sem er í efstu deild HM, en Danir munu halda HM í ár, sem verið hefur markmið þeirra um nokkurt skeið. Komist leikmenn langt í úrslitakeppni NHL stangast það á við HM í maí.