„Þetta er búið að vera mjög fínt og það er gott að vera kominn heim,“ sagði Elvar Már Friðriksson í samtali við Morgunblaðið.
Elvar er besti leikmaður desembermánaðar í Dominos-deild karla í körfubolta að mati Morgunblaðsins. Njarðvík er búið að vinna alla fimm leiki sína síðan Elvar kom til félagsins um miðjan nóvember og alls sjö leiki í röð, en þrátt fyrir það vill Elvar sjá enn meira frá liðinu.
„Hlutverkaskiptin í liðinu riðluðust smá eftir að ég kom inn og við eigum enn þá svolítið í land. Við erum að fínpússa leikinn okkar og það er stígandi í þessu hjá okkur. Við viljum vera sem bestir í úrslitakeppninni. Þegar við náum áhlaupum í leikjum viljum við halda betur út. Við erum oft búnir að ná forskoti en svo missum við það strax aftur niður. Við viljum læra að stíga aðeins betur á bensíngjöfina og klára leikina. Nokkrir leikir eru búnir að vera jafnir, sem mér finnst við hafa átt að klára fyrr,“ sagði Elvar.
Leikstjórnandinn byrjaði tímabilið hjá Denain-Voltaire í frönsku B-deildinni. Hann gekk í raðir félagsins í sumar ásamt Kristófer Acox, liðsfélaga sínum hjá íslenska landsliðinu. Samningi hans var hins vegar sagt upp í kjölfar þess að Kristófer óskaði eftir því leita á önnur mið vegna skipulagsbreytinga. „Það reyndi á sjálfstraustið að vera úti því það gekk ekki nægilega vel. Sumir leikir voru góðir en það var meira skortur á tækifærum sem var ekki gott. Ég var nýliði í atvinnumennsku og þá fær maður stundum ekki stórt hlutverk. Lítið hlutverk hentaði mér ekki vel. Ég ætlaði að koma hægt og rólega inn í þetta hjá Njarðvík og vinna upp sjálfstraustið mitt aftur. Það gekk hraðar en ég bjóst við. Það hjálpaði að koma inn í umhverfi sem ég þekki og það hefur gengið vel að hjálpa Njarðvík að vinna leiki,“ sagði Elvar og viðurkenndi að hann hefði ekki ætlað að koma heim á þessum tímapunkti, enda nýbyrjaður í atvinnumennsku.
„Það var aldrei planið að koma heim en ég geri eins gott úr þessu og hægt er. Ég læri á þessu því þetta var lærdómsríkur tími, þótt þetta hafi bara verið nokkrir mánuðir. Þetta fer í reynslubankann. Núna veit ég hvernig atvinnumennskan gengur fyrir sig og ég einbeiti mér að því jákvæða við þennan tíma.“