Tindastóll er kominn í 1:0 í einvígi sínu gegn Snæfelli í umspili um sæti í efstu deild kvenna í körfubolta.
Skagfirðingar gerðu góða ferð í Stykkishólminn og unnu 82:73-sigur í fyrsta leik liðanna í dag. Snæfell endaði í neðsta sæti úrvalsdeildarinnar og Tindastóll í fjórða sæti 1. deildarinnar.
Tindastóll vann fyrstu þrjá leikhlutana og var staðan fyrir fjórða og síðasta leikhlutann 63:53. Snæfell vann fjórða og síðasta leikhlutann 20:19 en það dugði skammt.
Ifunanya Okoro skoraði 25 stig fyrir Tindastól og Emese Vida 20. Shawnta Shaw skoraði 34 stig fyrir Snæfell en þau dugðu ekki til. Jasmina Jones gerði 11.