59 Krónan ehf.

Stærðarflokkur Stórt
Röð innan flokks 59
Landshluti Höfuðborgarsvæði
Atvinnugrein Heild- og smásöluverslun, viðgerðir á vélknúnum ökutækjum
Starfsemi Stórmarkaðir og matvöruverslanir
Framkvæmdastjóri Gréta María Grétarsdóttir
Fyrri ár á listanum 2014–2018
Framúrskarandi 2019

Hvernig gengur reksturinn?

Eignir 5.964.593
Skuldir 4.403.494
Eigið fé 1.561.099
Eiginfjárhlutfall 26,2%
Allar fjárhæðir eru í þúsundum króna

Eigendur og eignarhald

Þekktir hluthafar 2
Endanlegir eigendur 79
Eignarhlutur í öðrum félögum 2
Endanleg eign í öðrum félögum 0

Lánshæfismat félaga í sömu grein

Meðallánshæfi félaga í atvinnugreininni Stórmarkaðir og matvöruverslanir

pila

Miðlungi áhættumikil

Meira um fyrirtækið hjá CreditInfo

Um­hverf­is­vernd­in er langt ferðalag

„Okk­ar hlut­verk er að gera það sam­fé­lag sem við búum í betra,“ seg­ir Gréta María Grét­ars­dótt­ir, fram­kvæmda­stjóri Krón­unn­ar, all­ir fari í Krón­una og það sé versl­un­ar­inn­ar að minnka mat­ar­sóun og vera orku­spar­andi í inn­kaup­um. Um­hverf­is­vernd­in sé lang­ferð og nauðsyn­legt að taka stöðugt skref fram á við.

Í mynd­skeiðinu er rætt við Grétu um starf­sem­ina, framtíðar­stefnu, sam­fé­lags­ábyrgð og kjarna Krón­unn­ar sem er eitt Framúrsk­ar­andi fyr­ir­tækja Cred­it­in­fo í ár.

Þetta er annað mynd­skeiðið sem mbl.is birt­ir í sam­vinnu við Cred­it­in­fo um fyr­ir­tæki sem fengu viður­kenn­ingu í síðustu vik­u fyr­ir að vera Framúrsk­ar­andi. Á föstu­dag var fjallað um ORF líf­tækni.

Að neðan er umfjöllun um Krónuna sem birtist í sérblaði Morgunblaðsins um Framúrskarandi Fyrirtæki Creditinfo.

Það að Krónan sé á meðal Framúrskarandi fyrirtækja Creditinfo er til marks um þá frábæru vinnu sem starfsfólk verslunarkeðjunnar leggur á sig á degi hverjum að sögn Grétu Maríu Grétarsdóttur, framkvæmdastjóra Krónunnar. Krónan hefur upp á síðkastið komist í kastljós fjölmiðla reglulega fyrir umhverfisstefnu fyrirtækisins. Það hlaut Kuðunginn, umhverfisviðurkenningu umhverfis- og auðlindaráðuneytisins, fyrr á árinu, og á dögunum Umhverfisverðlaun atvinnulífsins fyrir framtak ársins í að hafa jákvæð áhrif á umhverfi sitt og sýna frumkvæði í nýjum verkefnum.

Hér er um að ræða framtak á borð við „Síðasta séns“ þar sem hægt er að kaupa ávexti og grænmeti á lægra verði þegar vörur nálgast síðasta söludag. Þá er einnig hægt að nýta sér sérstakt afpökkunarborð í verslunum Krónunnar þar sem viðskiptavinir geta losað sig við óþarfa umbúðir sem Krónan sér um að flokka og setja í endurvinnslu.

Krónan markar sér sérstöðu í umhverfis- og lýðheilsumálum

Að sögn Grétu er vitanlega mikil samkeppni á matvörumarkaði en Krónan hefur markað sér sérstöðu á markaðnum í umhverfis- og lýðheilsumálum sem viðskiptavinir taka vel í að sögn Grétu.

„Þú sérð það þegar þú gengur inn í Krónubúðir að hollustan fær gott pláss hjá okkur. Í umræðunni núna um sykurskatt þá gleymist það oft að það þarf ekkert alltaf aðkomu ríkisins til þess að breyta einhverjum neysluvenjum. Það er líka á ábyrgð okkar í Krónunni að stilla búðinni upp þannig að hollustan fái besta plássið. Við höfum alveg séð að það hefur áhrif á neysluna,“ segir Gréta en ávextir og grænmeti mætir viðskiptavinum Krónunnar t.d. fyrst í versluninni, og þá er ekkert sælgæti lengur að fá á afgreiðslukössum. Eitthvað sem foreldrar þreyttra barna kunna vel að meta að sögn Grétu.

Gréta María er framkvæmdastjóri Krónunnar. Hún segir starfsfólk fyrirtækisins lykilinn ...
Gréta María er framkvæmdastjóri Krónunnar. Hún segir starfsfólk fyrirtækisins lykilinn að velgengni þess. Kristinn Magnússon

„Öll fyrirtæki þurfa að sýna frumkvæði. Við eigum ekki alltaf að bíða eftir því að eitthvað sé ákveðið fyrir okkur. Með því að sýna frumkvæði höfum við áhrif á samfélagið og áhrif á þær ákvarðanir sem koma í kjölfarið. Það sést á tölunum okkar að viðskiptavinirnir eru ánægðir með það sem við erum að gera,“ segir Gréta.

Hún segir hlutina gerast hratt á matvörumarkaðnum og því þurfi fyrirtæki að vera opin fyrir breytingum.

„Og við í Krónunni erum rosalega opin fyrir breytingum. Það er ekki í öllum fyrirtækjum þar sem starfsmenn og stjórnendur eru á hverjum degi að leita að leiðum til þess þróast og gera breytingar. Ef þú þróast ekki þá á endanum deyrðu. Við ætlum okkur að þróast áfram og vera í fararbroddi þegar kemur að þessum breytingum í samfélaginu,“ segir Gréta.

Hafa áhrif til lækkunar

Spurð um rekstrarumhverfið almennt segir Gréta að samkeppnin á matvörumarkaði sé gríðarlega mikil.

„Fyrst og fremst erum við að keppa í verði. Við viljum virka samkeppni á markaði og trúum að við höfum áhrif til lækkunar á verðlag á matvöru,“ segir Gréta og heldur áfram:
„Það er mikil barátta á þessum markaði. Gengi krónunnar [gjaldmiðilsins] hefur einnig mikil áhrif á okkur því við getum ekki velt öllum sveiflum út í verðlagið. Við sjáum það núna að margir íslenskir framleiðendur hafa hækkað verð en við reynum alltaf að halda okkar verðlagi eins lengi og við getum en við getum ekki hagrætt endalaust í okkar rekstri. Launahækkanir hafa líka áhrif og það hefur áhrif á verð þegar svona mörg ár af launahækkunum hafa verið,“ segir Gréta.

Að sögn Grétu felast ekki endilega miklir hagræðingarmöguleikar í sjálfsafgreiðslukössum sem hafa orðið sífellt algengari sjón í verslunum hér á landi. Ávallt sé að minnsta kosti einn gamaldags beltakassi opinn auk þess sem sjálfsafgreiðslan hefur alltaf einn starfsmann verslunarinnar á vakt.

„Starfsfólki hefur ekki fækkað við það að nota sjálfsafgreiðsluna. Við lítum frekar á þetta sem aukna þjónustu við viðskiptavini og nýtum tímann í annað svo að búðin sé í betra standi fyrir viðskiptavini. Sjálfsafgreiðslan er alltaf mönnuð með einum starfsmanni. Í minni búðum þar sem við höfum oft verið með einn starfsmann á kassa höfum við nú sjálfsafgreiðslukassa og starfsmann þar líka sem dæmi,“ segir Gréta.

Hún segir sjálfsafgreiðsluna hafa reynst versluninni gríðarlega vel.

„Við erum að sjá vel yfir helming afgreiðslna fara í gegnum sjálfsafgreiðslu. Veltan er þó töluvert minni þar sem stóru körfurnar fara yfirleitt á beltakassana. En á sama tíma eru margir sem segja við okkur að þeir hafi áttað sig á því að eftir að sjálfsafgreiðslan varð boði hafi þeir enga þolinmæði til þess bíða í röð lengur,“ segir Gréta.

Krónan hefur tekið sjálfsafgreiðslukassa í sína þjónustu á síðustu misserum.
Krónan hefur tekið sjálfsafgreiðslukassa í sína þjónustu á síðustu misserum. Eggert Jóhannesson

Vilja opna Kr-búð í borginni

Krónan rekur í dag 20 verslanir, tvær Kr-verslanir, tvær Kjarvals-verslanir og eina Nóatúnsbúð. Að sögn Grétu leitar fyrirtækið nú að heppilegri staðsetningu á höfuðborgarsvæðinu fyrir Kr-verslanir, sem oft eru kallaðar „Krónubörn“, með svipuðum innréttingum, með um 2.000 vörur á Krónuverði og aðrar vörur á stórmarkaðsverði og aðlagaðar því svæði sem búðin er staðsett á en núna rekur Krónan Kr-búðir í Vík í Mýrdal og í Þorlákshöfn.

„Við erum að skoða eina staðsetningu og ef allt gengur að óskum erum við að horfa á að opna eina slíka á fyrri hluta næsta árs,“ segir Gréta. Krónan hefur sterka stöðu á höfuðborgarsvæðinu en er einnig víða um land, m.a. í Reykjanesbæ, á Akranesi, Selfossi, í Vestmannaeyjum og á Reyðarfirði en þó ekki á Akureyri, höfuðstað norðursins. Gréta segir að stefnan sé að opna verslun þar.

„Við erum alltaf á leiðinni og eigum lóð á Akureyri á frábærum stað á móti Glerártorgi. Við erum að vinna með skipulagsyfirvöldum og öðrum lóðarhöfum með það að komast af stað. En það hefur tekið allt of langan tíma og við viljum sjá þetta hreyfast hraðar,“ segir Gréta.

Ein af nýjustu verslunum Krónunnar er staðsett á mörkum Garðabæjar ...
Ein af nýjustu verslunum Krónunnar er staðsett á mörkum Garðabæjar og Kópavogs. Eggert Jóhannesson
mbl.is

Fleiri greinar og viðtöl

Samstarfsaðilar