Sund er ekki hluthafi í NTH

Sund ehf. er ekki lengur hluthafi í Northern Travel Holding (NTH), sem m.a. er eignarhaldsfélag flugfélaganna Sterling og Iceland Express. Að sögn Jóns Kristjánssonar, stjórnarformanns, var 22% hlutur Sunds seldur í lok síðasta árs.

Þorsteinn Örn Guðmundsson, forstjóri NTH, staðfesti við Morgunblaðið að hlutur Sunds væri nú í eigu NTH. Aðrir hluthafar eru Fons hf. með 44% og FL Group með 34%.

Danska viðskiptablaðið Börsen hafði í gær eftir ónefndum heimildamanni að Sund og Fons hygðust selja hlut sinn í NTH. Ljóst er að Sund er ekki „á útleið“ og Pálmi Haraldsson í Fons hafnar því alfarið að sala sé á dagskrá.

„Blaðamaður Börsen hringdi í mig og ég neitaði þrisvar þegar hann spurði mig aftur og aftur hvort ég ætlaði að selja hlutinn í Sterling og hvort ég ætlaði að selja hlutinn í Northern Travel Holding,“ segir Pálmi, pirraður út í danska blaðamenn. Börsen hefur eftir Pálma að sala hafi aldrei verið rædd í stjórninni, en fyrirsögn fréttarinnar er engu að síður „Eigendur Sterling leitast við að losna“.

Enginn samruni í bígerð nú

Þorsteinn Örn Guðmundsson tekur undir orð Pálma. Um þessar mundir sé NTH ekki að vinna að neinum samruna, en almennt megi eiga von á frekari samþjöppun á markaði lágfargjaldaflugfélaga.