Spá lækkandi verðbólgu fram á mitt ár

Framan af næsta ári má búast við hjöðnun verðbólgu, enda hækkaði verðlag skart á fyrri hluta yfirstandandi árs og því detta myndarlegar hækkunarmælingar úr 12 mánaða takti vísitölu neysluverðs á fyrri helmingi næsta árs. Þetta segir greiningardeild Íslandsbanka og gerir ráð fyrir að verðbólgan verði lægst um mitt næsta ár þegar hún nær um 3%. Í framhaldi af því aukist hún aftur og verði 3,8% í desember 2013. Útlit er svo fyrir að verðbólga árið 2014 verði í kring um 4%.

Greiningardeild bankans telur að verðlag í nóvember hækki um 0,1% og í desember um 0,5%. Í desember gerir hún ráð fyrir talsverðri hækkun á matvöru í aðdraganda jólanna, auk þess sem flugfargjöld til útlanda hækka þá jafnan hressilega í mælingu Hagstofunnar. Í janúar vegast að vanda á áhrif af hækkun á gjaldskrám og opinberum gjöldum annars vegar, og útsölum hins vegar.

Spá greiningardeildar Íslandsbanka um þróun verðbólgu Íslandsbanki

• Blogga um frétt