Raungengi krónunnar lækkar áfram

Í nóvember lækkaði raungengi íslensku krónunnar um 1,3% frá fyrri mánuði á mælikvarða hlutfallslegs verðlags. Er þetta þriðji mánuðurinn í röð sem þróunin á raungengi krónunnar er í þessa átt og hefur það lækkað um 7,0% frá því í ágúst. Þetta kemur fram í morgunkorni greiningardeildar Íslandsbanka.

Segir þar að líkt og síðustu tvo mánuði megi rekja þessa lækkun á raungengi krónunnar að öllu leyti til lækkunar á nafngengi krónunnar sem lækkaði um 1,6% milli október og nóvember miðað við vísitölu meðalgengis. Á móti var hækkun verðlags talsvert meiri hér á landi en í okkar helstu viðskiptalöndum í nóvember, enda var breytingin á nafngengi nokkuð meiri en breytingin á raungenginu. 

Greiningardeildin spáir áframhaldandi lækkun raungengis, en það stendur nú í 74,5 stigum sem er 22% undir meðaltali áranna 1980-2011. „Talsverðar líkur eru á að raungengi muni lækka enn frekar fram að næsta sumri, og að sagan verði svipuð og verið hefur, þ.e. að lækkunin stafi af nafngengislækkun krónu.“

• 1 blogg um fréttina

Bloggað um fréttina

• Gísli Foster Hjartarson: Út mað hana!!