Matarbloggarar hrifnir af kjúklingi

Lambaskanki með kartöflumauki og ofnbökuðu grænmeti.
Lambaskanki með kartöflumauki og ofnbökuðu grænmeti. mbl.is/Eggert Jóhannesson

„Ég kem með það sem ég sjálf hrífst af og margir lesa. Þar kemur kjúklingurinn langsterkastur inn og hann er notaður bæði spari og hversdags,“ segir Berglind Guðmundsdóttir matarbloggari sem heldur úti síðunni Gulur-Rauður-Grænn & Salt með áherslu á fljótlega rétti fyrir sælkera. Hún nefnir að auk kjúklingauppskrifta lesi fólk mikið eftirréttauppskriftir. Færslur um kjöt og fisk eru ekki eins vinsælar.

Í framhaldi af fréttum um nokkurn samdrátt í sölu lambakjöts á þessu ári hafa vaknað spurningar um það hvort lambakjötið höfði til ungs fólks, það kunni jafnvel ekki að elda það og finnist það dýrt. Einn Facebook-notandi skoðaði síður tveggja vinsælla matarbloggara sem talið er að yngra kynslóðin noti mikið. Lausleg talning sýndi að á annarri síðunni voru um 90 kjúklingauppskriftir á móti 6 lambakjötsréttum og á hinni rúmlega 40 uppskriftir með kjúklingi á móti 4 með lambakjöti. Auk þess var mikill fjöldi af nautahakksuppskriftum á báðum síðum.

„Þetta er örugglega einhver hluti af skýringunni enda teljum við að sækja þurfi meira fram á þessum markaði. Hafa fjölbreyttara vöruframboð og sveigjanlegri vörur,“ segir Sigurður Eyþórsson, framkvæmdastjóri Landssamtaka sauðfjárbænda og Markaðsráðs kindakjöts, þegar þetta er borið undir hann og spurt hvort lambakjötið höfði ekki lengur til ungs fólks.

Sækja uppskriftir á netið

Matarbloggarar höfða til mismunandi markhópa, bæði eftir aldri og áhugasviðum í matreiðslu. Flestir eru að draga eitthvað nýtt fram. Ragnar Freyr Ingvarsson matarbloggari telur að sú kynslóð sem kemur á eftir hans styðjist nær eingöngu við netið við matreiðslu og fari þá bæði á innlendar og erlendar síður. Hann er með vinsæla síðu, Læknirinn í eldhúsinu, gefur út matreiðslubækur og gerir sjónvarpsþætti. Hann segir að matarbloggararnir sjái hvaða fólk lesi færslurnar. „Þeir sem eru nær mér í aldri fylgjast með hjá mér. Ég held að það sé alltaf þannig, fólk þroskast á svipaðan hátt í matreiðslunni, byrjar á einhverju einföldu og fer einhvern tímann að standa sjö tíma í eldhúsinu. Eftir að hafa farið um matargerðarlist alls heimsins kemur svo gamli heimilismaturinn allt í einu aftur og maður fer að gera eigin kæfu og annað slíkt,“ segir Ragnar.

Hann telur að lambakjötið sé samofið þessari þróun. Það taki tíma fyrir fólk að þroskast inn í það og átta sig á því hvernig best er að nota það.

Þá skipti tíminn máli, að sögn Ragnars. Kjúklingurinn hafi yfirburði á því sviði því það taki aðeins nokkrar mínútur að gera góðan rétt úr honum. Ef taka eigi sambærilegan vöðva af lambinu, til dæmis lambalund, taki það klukkutíma og kortér, hjá manni sem kunni vel til verka. „Á því sviði verður lambið undir, því miður,“ segir Ragnar.

Berglind Guðmundsdóttir telur algengt að fólk hugsi um lambakjöt sem læri eða hrygg í ofni. Það henti ekki vel í hraða dagsins, þegar fólk komi heim úr vinnu og taki til við að elda kvöldmatinn. Meiri skipulagningu þurfi til þess. Þess vegna verði fljótlegri réttirnir fyrir valinu, til dæmis kjúklingur.

Berglind segir hægt að vinna heilmikið með lambakjötið. Elda það samkvæmt aðferðum sem notaðar eru í fjarlægum löndum þar sem það er vinsælt.

Þarf að gera betur

Sigurður Eyþórsson kannast vel við umræðuna um að lambakjötið sé að verða undir. „Stærstu breytingarnar á kjötmarkaði eru ekki séríslenskar. Hlutdeild kjúklinga á kjötmarkaði hefur fimmfaldast frá því byrjað var að selja þá ferska.“

Hann segir að afurða- og sölufyrirtæki lambakjöts þurfi að gera betur í vöruþróun til að bregðast við breytingum á markaðnum og hafa samtök sauðfjárbænda ýtt á það. Fyrirtækin hafa gert ýmislegt í því að koma aðgengilegri vöru á markað.

Sigurður segir að það sé ekki ný umræða að ungt fólk borði minna af lambakjöti. „Þetta er samt þannig að þegar fólk eldist, fer það meira að huga að lambakjötinu. Það sýna einnig sölutölur. Lambakjötið hefur haldið ágætlega hlutdeild sinni á kjötmarkaðnum á undanförnum árum.“

Markaðsfólk lambakjötsins hefur reynt að nota sér nýjað aðferðir við markaðssetningu. Það rekur uppskriftavefinn lambakjot.is sem tengdur samfélagsmiðlum og dreifir snjallsímaappi á síðunni. Sigurður tekur fram að fólk noti mismunandi aðferðir til að ná sér í upplýsingar og því þurfi víðtæka miðlun til að ná til allra. Vissulega séu þarna tækifæri sem mætti nýta betur.

Erlend neysluáhrif

Kjötneysla Íslendinga er nokkuð frábrugðin því sem algengast er í nágrannalöndum. Einkum sker lambakjötið sig úr, með margfalt stærri hlutdeild hér en víðast hvar annars staðar.

Ragnar Freyr telur aðspurður ekki ólíklegt að neyslumynstrið frá nágrannalöndunum smiti hingað í gegnum innlend og erlend matarblogg og matreiðsluþætti í sjónvarpi. Sú staðreynd að mikið þurfi að hafa fyrir því að finna lambakjöt í stórmörkuðum erlendis endurspeglist í þeim upplýsingaveitum sem fólk noti. Þar fari jafn lítið fyrir lambakjötinu.

„Öll speglum við þann veruleika sem við viljum lifa í. Minn veruleiki er að kaupa gott hráefni, nostra við það frá grunni og elda og setjast síðan niður með fjölskyldunni. Það vil ég sýna á minni síðu,“ segir Ragnar.

Berglind Guðmundsdóttir matarbloggari sem heldur úti síðunni Gulur-Rauður-Grænn & Salt.
Berglind Guðmundsdóttir matarbloggari sem heldur úti síðunni Gulur-Rauður-Grænn & Salt. Rósa Braga
Kjúklingur sem er auðvelt að matbúa. Uppskrift af Gulur, rauður, ...
Kjúklingur sem er auðvelt að matbúa. Uppskrift af Gulur, rauður, grænn og Salt. Ljósmynd/Berglind Guðmundsdóttir
Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.790 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »

  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK