Forstjóri Rio Tinto, Sam Walsh, mun láta af störfum í júlí og Frakkinn Jean-Sebastien Jacques tekur við starfinu. Þetta kemur fram í tilkynningu frá námafyrirtækinu sem meðal annars á og rekur álverið í Straumsvík.

Walsh hefur verið forstjóri Rio Tinto í rúm þrjú ár og á þeim tíma hefur niðurskurðarhnífurinn verið hátt á lofti vegna verðlækkana á hrávörumarkaði. Hann mun einnig fara úr stjórn fyrirtækisins á sama tíma og hann lætur af starfi forstjóra.

Jacques, sem nú stýrir kopar og kolastarfsemi samsteypunnar á skrifstofu fyrirtækisins í London, verður aðstoðarforstjóri þangað til hann tekur við starfi forstjóra og eins kemur hann inn í stjórn félagsins strax.

Rio Tinto tapaði 866 milljónum Bandaríkjadala, 110 milljörðum króna, á síðasta ári og er tapið einkum rakið við verðlækkunar á hrávörumarkaði. Fyrirtækið hefur hert sultarólina í baráttunni við verðfallið og mun herða hana enn frekar. Stefnt er að því að draga úr rekstrarkostnaði sem nemur einum milljarði Bandaríkjadala, 127 milljörðum króna, í ár og sömu fjárhæð á næsta ári. Jafnframt verður dregið verulega úr fjárfestingum.

Tengdar fréttir

Kjaraviðræður

Kjaradeilu vísað til ríkissáttasemjara

• Hægagangur og vaxandi ókyrrð
• Aðalsteinn snýr aftur í Karphúsið
• „Mætti ganga hraðar“
• „Okkur þykir Isavia fullrólegt“

» Fleiri tengdar fréttir

• Blogga um frétt