Norðmenn kaupa 50% í Arctic Fish
Norska fiskeldisfyrirtækið Norway Royal Salmon (NRS) er að kaupa helmingshlut í vestfirska fiskeldisfyrirtækinu Arctic Fish.
Samkvæmt tilkynningu NRS til kauphallarinnar í Ósló greiðir fyrirtækið 29 milljónir evra fyrir 50% hlut í Arctic Fish en annað hlutafé er í eigu eignarhaldsfélaganna Bremesco Holding og Novo (47,50% og 2,50%). Þetta kemur fram á vefnum Undercurrent News.
Bremesco Holding er í eigu Jerzy Malek, sem stofnaði pólska laxeldisfyrirtækið Morpol. Malek færði út laxeldiskvíarnar í Noregi og Bretlandi en seldi fyrirtækið síðar til Marine Harvest.
Malek vildi ekki tjá sig um viðskiptin á Íslandi við Undercurrent News. Malek er stjórnarformaður Arctic Fish en þegar kaup NRS á helmingshlut í fyrirtækinu ganga í gegn verður nýr stjórnarformaður valinn. Aðrir í stjórn verða tveir fulltrúar frá NRS og tveir frá Bremesco.
Engar breytingar verða gerðar á framkvæmdastjórn Arctic Fish og verður Sigurður Pétursson, stofnandi Arctic Fish, áfram framkvæmdastjóri.
Í frétt Undercurrent News kemur fram að NRS fylgir hér í fótspor keppinautar, norska eldisfyrirtækisins SalMar, en fyrirtækið keypti 235 hluti í Arnarlaxi í vetur og í vor var tilkynnt um að Arnarlax hefði keypt Fjarðalax.
Í Morgunblaðinu í vor kom fram að stefnt væri að skráningu sameinaðs fyrirtækis á markað innan tveggja ára.
Sameinað fyrirtæki starfar undir merkjum Arnarlax og höfuðstöðvar þess eru á Bíldudal. SalMar er kjölfestufjárfestir ásamt Matthíasi Garðarssyni og Kristian Matthíassyni, stærstu eigendum Arnarlax. Kristian verður forstjóri félagsins. Kjölfestufjárfestir Fjarðalax mun einnig verða hluthafi. Fjarðalax er með sjókvíaeldi í þremur fjörðum Vestfjarða og er stærsta fiskeldisfyrirtæki landsins.
