Nýir eigendur móðurfélags Magma Energy Sweden hafa greitt upp skuldabréf sem var gefið út í tengslum við kaup fyrirtækisins á hlut Orkuveitu Reykjavíkur í HS Orku hf. árið 2009. Lokagreiðslan nam um 39 milljónum bandaríkjadala, sem svara til tæplega fjögurra milljarða króna og var á gjalddaga í apríl 2018.
Skuldabréfsins hefur verið getið sem áhættuþáttar í Fjármálaskýrslum OR. Í tilkynningu frá OR kemur fram að með uppgreiðslunni hafi þeirri áhættu verið eytt.
Skuldabréfið, sem var gefið út af Magma Energy Sweden A/B árið 2009, var hluti greiðslu fyrir hlut OR í HS Orku, sem seldur var eftir að samkeppnisyfirvöld settu eignarhaldi OR í fyrirtækinu skorður. Á bak við bréfið stendur veð í hlutabréfum í HS Orku.
Sumarið 2013 var ákveðið að taka tilboði fjármálafyrirtækisins Landsbréfa í skuldabréfið en tilboðið féll úr gildi eftir að Landsbréfum mistókst að fjármagna kaupin í tæka tíð.
Tveimur árum síðar náðu Orkuveitan og Magma Energy Sweden samkomulagi um breyttar afborganir á skuldabréfi sem gjaldfalla átti í einu lagi í desember 2016. Samið var um að helmingur fjárhæðar bréfsins yrði greiddur við staðfestingu samkomulagsins og hinn helmingur á fyrri hluta árs 2018.