Iceland Travel var valið menntafyrirtæki ársins 2018 á hinum árlega Menntadegi atvinnulífsins sem var haldinn í Hörpu í dag.
Iceland Travel er ferðaskrifstofa í móttöku erlendra ferðamanna og stefnir ársveltan í 14 milljarða. Farþegar sem koma til Íslands á vegum Iceland Travel eru eitt hundrað og fimmtíu þúsund. Átta af hverjum tíu starfsmanna fyrirtækisins hafa lokið háskólaprófi, flestir af viðskipta-, ferðamála- eða tungumálabrautum.
„Fræðslustarf okkar hefur verið rekið undir merkjum Iceland Travel-skólans. Þar hafa fjölmargir utanaðkomandi sérfræðingar á sínu sviði kennt námskeið og haldið fyrirlestra. Skólinn hefur einnig verið góður vettvangur fyrir starfsfólk að miðla af þekkingu sinni og reynslu,“ segir Hörður Gunnarsson, framkvæmdastjóri Iceland Travel.
Landsnet var valið menntasproti ársins 2018. Landsnet vinnur með Háskóla Íslands, Háskólanum í Reykjavík og Rafiðnaðarskólanum og nemendum býðst að vinna hagnýt lokaverkefni sem nýtast samfélaginu. Þá tekur fyrirtækið þátt í mikilvægum erlendum rannsóknarverkefnum, til dæmis stærsta rannsóknarverkefni sinnar tegundar í heiminum sem kostar um 14 milljónir evra og miðar að því að auka áreiðanleika flutningskerfa á sama tíma og kostnaði samfélagsins er haldið í lágmarki.
Menntadagur atvinnulífsins er samstarfsverkefni undirfélaga Samtaka atvinnulífsins. Í dómnefnd sátu Guðný B. Hauksdóttir, framkvæmdastjóri mannauðsmála hjá Alcoa Fjarðaáli, Magnea Þórey Hjálmarsdóttir, framkvæmdastjóri Icelandair Hotels, Sigurður Steinn Einarsson aðstoðarmaður forstjóra hjá Síldarvinnslunni í Neskaupstað og Ragnheiður H. Magnúsdóttir, viðskiptastjóri hjá Marel.