Fjórir nýir forstöðumenn hjá Veitum

Hafliði Jón Sigurðsson, Arndís Ósk Ólafsdóttir, Harpa Þuríður Böðvarsdóttir og ...
Hafliði Jón Sigurðsson, Arndís Ósk Ólafsdóttir, Harpa Þuríður Böðvarsdóttir og Guðbjörg Sæunn Friðriksdóttir. Samsett mynd

Veitur hafa ráðið nýja forstöðumenn í vatnsveitu, fráveitu, hitaveitu og í stefnu og árangur. Nýju forstöðumennirnir fjórir eiga að leiða Veitur í áframhaldandi uppbyggingu hagkvæmra veitukerfa með öryggi og umhverfissjónarmið að leiðarljósi.

Frá þessu er greint í fréttatilkynningu.

Arndís Ósk Ólafsdóttir hefur verið ráðin forstöðumaður vatnsveitu. Hún lauk BS-prófi í umhverfis- og byggingarverkfræði frá Háskóla Íslands 2004 og meistaragráðu í Water Resource Engineering frá Heriot Watt University í Edinborg 2006. Eftir námslok hóf hún störf hjá Hyder Consulting í Edinborg við hermun og hönnun fráveitukerfa 2006-2007 og vann við vatnsveituverkefni í Namibíu fyrir Þróunarsamvinnustofnun Íslands. Arndís Ósk var ráðin til Orkuveitu Reykjavíkur í lok árs 2007 sem verkefnastjóri og tók við sem fagstjóri vatnsveitu 2010. Frá árinu 2017 hefur hún starfað sem tæknistjóri vatnsveitu.

Guðbjörg Sæunn Friðriksdóttir hefur verið ráðin forstöðumaður fráveitu. Hún útskrifaðist með BS-próf í rekstrarverkfræði frá Háskólanum í Reykjavík árið 2010 og með M.Sc-próf í iðnaðarverkfræði frá Háskóla Íslands árið 2012. Frá því hún lauk námi hefur hún starfað á framleiðslusviði Össurar, fyrst sem ferilseigandi á CNC-renniverkstæðinu þar til hún tók við öryggis- og umbótasviði framleiðslu og síðustu þrjú árin hefur hún starfað sem framleiðslustjóri silikondeildar.

Hafliði Jón Sigurðsson hefur verið ráðinn forstöðumaður hitaveitu. Hann útskrifaðist með B.Sc í véla- og iðnverkfræði 2002 og M.Sc í vélaverkfræði frá Háskóla Íslands árið 2004. Hann starfaði hjá Icelandair 2004-2007 sem hönnuður og verkefnastjóri og síðan sem deildarstjóri viðhaldsstýringar á árunum 2007-2015. Á árunum 2015 – 2016 starfaði Hafliði Jón hjá Rhino Aviation sem framkvæmdastjóri sölu- og markaðsmála. Hann hóf störf hjá Veitum 2016 sem forstöðumaður rekstrar.

Harpa Þuríður Böðvarsdóttir hefur verið ráðin forstöðumaður stefnu og árangurs. Hún lauk BA-prófi í stjórnmálafræði frá Háskóla Íslands árið 2000 og meistaragráðu í stjórnun og stefnumótun frá sama skóla 2004. Þá stundaði hún meistaranám í fjármálum fyrirtækja frá Háskólanum í Reykjavík og útskrifaðist þaðan 2017. Harpa Þuríður starfaði í 14 ár hjá Actavis hér á landi, Norðurlöndunum og með dótturfyrirtækinu Medis á ýmsum erlendum mörkuðum. Hjá Actavis sinnti hún nokkrum störfum en lengst af sem starfsmannastjóri (Director, HR & Org. Development) fyrirtækisins á Íslandi. Á árinu 2018 starfaði hún sem verkefnastjóri stefnumótunar á skrifstofu ráðuneytisstjóra í velferðarráðuneytinu. 

mbl.is

Myntbreyta

  ISK
  USD
  EUR
  GBP
  CAD
  DKK
  NOK
  SEK
  CHF
  JPY

Erlendar viðskiptafréttir