Hluthafar vilja Heimavelli af markaði

Stjórn Heimavalla barst í dag bréf frá þremur hluthöfum þar sem farið er fram á við stjórn félagsins að hún boði til hluthafafundar þar sem tillaga verði gerð um töku hlutabréfa félagsins úr viðskiptum í Kauphöllinni, eða að slík tillaga verði sett á dagskrá aðalfundar þann 14.mars 2019.

Þetta kemur fram í tilkynningu Heimavalla til Kauphallar, sem send var eftir lokun markaða í dag. Mat þriggja hluthafa, Snæbóls ehf., Gana ehf. og Klasa ehf., sem samanlagt eiga 18,93% í Heimavöllum, er að viðskipti með hlutabréfin í Kauphöll „hafi ekki skilað væntum ávinningi fyrir hluthafa og félagið.“

Í bréfinu til stjórn Heimavalla kom einnig fram að félögin Sigla ehf. og Alfa Framtak ehf. muni fjármagna valfrjálst tilboð í hlutabréf Heimavalla hf., sem lagt verði fram í samræmi við lög um verðbréfaviðskipti, en tilgangurinn með tilboðinu er að greiða fyrir því að Heimavellir verði afskráð í Kauphöllinni.

Heimavellir hf. var skráð á markað í maí síðastliðnum, en virði félagsins á hlutabréfamarkaði hefur farið minnkandi frá skrásetningu og verið undir bókfærðu virði eigna þess.

• Blogga um frétt