Sigríður V. Vigfúsdóttir, framkvæmdastjóri Primex, segir mikla viðurkenningu og tækifæri felast í þessu. „Við sýndum líkamskrem og skrúbb úr vörulínu sem við köllum ChitoCare Beauty, en þetta eru fyrstu snyrtivörurnar frá Primex sem við setjum á markað. Í ljósi þess að vörur frá okkur eru óþekktar í alþjóðlegum snyrtivöruheimi er þetta mjög góður árangur. Þetta á tvímælalaust eftir að hjálpa okkur mikið í markaðssetningu og vekur athygli á vörumerkinu,“ segir Sigríður.
Fyrirtækið Primex Iceland er dótturfyrirtæki Ramma hf í Fjallabyggð og hóf framleiðslu 1999. Á þriðjudag var 20 ára afmæli fyrirtækisins fagnað en nú starfa 14 manns hjá Primex í Siglufirði, auk sölufulltrúa í Bandaríkjunum og Evrópu. Fyrirtækið hefur lengst af framleitt vörur til sárameðhöndlunar og er helsti markaðurinn í Bandaríkjunum, en einnig í Asíu og Evrópu. Græðandi eiginleikar framleiðslunnar eru nýttir til fulls í snyrtivörunum.
Primex Iceland sérhæfir sig í þróun, framleiðslu og sölu á kítósanvörum fyrir fæðubótarefni, lækningatæki, snyrtivörur og ýmsa aðra notkun. Í tvo áratugi hefur Primex unnið að því að breyta hráefni sem áður var mengandi úrgangur í verðmætar afurðir sem bæta lífsgæði manna og dýra. Kítósan er að finna í öllum vörum fyrirtækisins.
Fyrirtækið kaupir rækjuskel af öllum framleiðendum hér á landi, en í skelinni eru kítín, prótein, kalk og steinefni og er kítínið einangrað úr því og framleitt kítosan. Kítósan eru nátúrlegar trefjar með einstaka eiginleika því uppleyst kítósan hefur jákvæða hleðslu sem gerir það að verkum að það binst við ýmis efni með neikvæða hleðslu, t.d. rauð blóðkorn. Þessi virkni gerir það að verkum að húðin, og þá um leið sár og ör, taka á móti kítósan.
„Primex Iceland hefur náð mestum árangri af kítósanframleiðendum í heiminum á framleiðslu og sölu á efni í sárameðhöndlun,“ segir Sigríður. „Það byrjaði allt þegar við hófum þróun með bandarísku fyrirtæki sem seldi og selur enn kítósanvörur sem notaðar eru í hernaði og hefur bandaríski herinn staðfest að þessar vörur hafi bjargað hundruðum mannslífa. Með vísindalega þekkingu og hágæða framleiðslu höfum við svo haldið áfram og sett á markað okkar eigin neytendavöru ChitoCare Medical sem eru græðandi sprey og gel.
Vörurnar hafa nú verið skráðar sem lækningatæki í Evrópu og er skráningu að ljúka hjá FDA í Bandaríkjunum. Græðandi vörurnar okkar hafa slegið í gegn hér heima en auk einstkra græðandi eiginleika þá dregur ChitoCare Medical úr örmyndun, sviða og kláða.“
Óhætt er að segja að leiðin sé löng frá því að rækjan kemur í trollið fyrir norðan land þar til efni úr skel hennar fer á markað í útlöndum sem hluti af hátæknivöru. Þá hefur Primex varðveitt mörg kolefnissporin með því að koma í veg fyrir að rækjuskel frá rækjuverksmiðjunum sé urðuð.
En sér Sigríður fyrirtækið dafna og vaxa næstu 20 árin?
„Sannarlega. Kitosan er tiltölulega nýtt efni og á því hafa verið gerðar gríðarlega miklar rannsóknir síðustu 20 árin. Við gerðum til dæmis í fyrra rannsókn varðandi liposan og þá kom í ljós að efnið hefur góð áhrif á þarmaflóru og ristil og bætir meltingu auk þess að hafa andoxunareiginleika og draga í sig sindurefni.
Þannig eru stöðugt að koma fram nýir eiginleikar og þá um leið möguleikar til frekari nýtingar. Þetta er umhverfisvæn starfsemi og það er dýrmætt að geta gert verðmæti úr því sem áður fór í sjóinn,“ segir Sigríður.