Stjórnendur þýsku smásölukeðjunnar Metro gefa lítið fyrir yfirtökutilboð tékkneska milljarðamæringsins Daniel Kretinsky og segja það allt of lágt.
Tilboðið var lagt fram óformlega á föstudag í nafni fyrirtækis í eigu Kretinsky, EP Global Commerce. Tilboðið hljóðar upp á 5,8 milljarða evra sem stjórnendur Metro telja verulega vanmat á virði keðjunnar.
Alls starfa um 150 þúsund manns hjá Metro og var velta keðjunnar 37 milljarðar evra í fyrra. Rekstur Metro hefur verið erfiður undanfarin misseri líkt og hjá mörgum smásölukeðjum í Evrópu. Metro var rekið með tapi á síðasta ársfjórðungi.
Kretinsky hefur farið mikinn í fjárfestingum undanfarin ár og tekið þátt í yfirtökum á evrópskum fyrirtækjum, einkum í orkugeiranum.
Um 25 þúsund starfa í orkufyrirtæki í hans eigu, EPH, og ræður það yfir rúmlega 50 orkuverum og námum í Tékklandi, Bretlandi, Ítalíu, Þýskalandi, Ungverjalandi, Póllandi og Slóvakíu.
Á síðasta ári mat Forbes eignir hans á 2,3 milljarða evra. Hann á hlut í nokkrum frönskum fjölmiðlum, þar á meðal Le Monde. Eins á hann hlut í knattspyrnufélaginu Sparta Prague.