Hagnaður Arion 4,9 milljarðar

Hagnaður Ari­on banka á öðrum árs­fjórðungi er um 4,9 millj­arðar samkvæmt afkomutilkynningu bankans. Hagnaður bank­ans á sama tíma­bili í fyrra var 2,1 millj­arður.

Reiknuð arðsemi bank­ans á árs­grund­velli er 10,5% í samanburði við 4,3% á sama tímabili í fyrra. 

Heildareignir námu 1.182 milljörðum króna í lok júní 2020, samanborið við 1.082 milljarða króna í árslok 2019. Lausafé bankans jókst þar sem ekki varð af fyrirhugaðri 10 milljarða króna arðgreiðslu, bankinn gaf út skuldabréf undir viðbótareiginfjárþætti 1 í febrúar og innlán jukust.

Lán til viðskiptavina hækkuðu lítillega frá áramótum, aðallega húsnæðislán. Innlán jukust um 12,8% frá áramótum. Heildar eigið fé í lok júní nam 189 milljörðum króna, samanborið við 190 milljarða króna í árslok 2019.

„Þrátt fyrir gott uppgjör á öðrum ársfjórðungi er mikilvægt að taka fram að enn er umtalsverð óvissa í starfsumhverfi bankans vegna Covid-19. Faraldurinn, þróun hans og áhrif á bæði innlent og alþjóðlegt efnahagslíf, mun áfram setja mark sitt á starfsemina. Óvissan snýr fyrst og fremst að þróun eignasafns bankans. Verulega dró úr niðurfærslum útlána á öðrum ársfjórðungi frá þeim fyrsta en við verðum að hafa í huga að skapast getur þörf á frekari niðurfærslum á meðan við göngum í gegnum núverandi efnahagsörðugleika. Fjárhagslegur styrkur Arion banka hvað varðar eigið fé og lausafé er hins vegar það mikill að bankinn er í góðri stöðu til að takast á við þær aðstæður sem eru uppi,“ er meðal annars haft eftir Benedikt Gíslasyni, bankastjóra Arion banka.

• Blogga um frétt